【母语客栈】ꉠꑵꉙ

ꉠꑵꉙ 

ꊾꑟ/ꁱ  ꑾꌋ/ꁏ

ꀘꊿ /ꐛꈩꒉꎄ

ꉠꑵꉙꆹ

ꉘꁮꍸꆧꁨꁵꇈꌠ

ꃅꃴꊏꃄꅉꁵꇈꌠ

ꃅꄂꇤꁧꐙꁵꇈꌠ

（ꀊꄶꁯꎓꃮꃅꏄꄮꐰ

ꀅꌳꀕꃅꁧ

ꉌꃀꁰꒌꐊꄉꁧ）

ꉠꑵꉙꆹ

ꎔꃨꌠꄮꐰꈢꋒꁧꊂ

ꐧꋦꊰꇈꌠꃰꌦꀮ

ꋌꈻꃅꈺꄂꀕ

ꀊꄶꐰꇑꈐꉘꇬꄉꐞꇁꌠꌡ

ꉠꑵꉙꆹ

ꀉꄶꏜꎔꏜꃨꊂꈹꄉ

ꁡꇤꒊꃀꂾꌠꐂꁧꇈ

ꐥꍂꃅꀱꀁꇬꇁꀋꄐꆘꅝꌠꑾꌺꍈ

（ꋍꑍꋑꀋꋒ，ꉘꃀꈨꑭꌄꌠ

ꅐꇆꁧꐧꁏꇀꆏ

ꑓꁴꐊꌠꉂꏣꑵꄚꄉ

ꐴꁘꂷꌵ）

ꉠꑵꉙꆹ

ꐰꇑꏁꊤꀕꇈꊂ

ꍸꇂꁍꁈꁵꇈꌠꑓꁴꄩ

ꁈꋍꌠꆹ

ꎽꃀꂷꊂꉬ

ꃅꃴꉪꏣꉬ

ꃅꏸꎭꏡꉬ

（ꁯꋒꃄꒌꏭꄮꇬ

ꉌꎭꉪꏣꆹꀊꄶꌞꃅꑲꒌꄩꏯꎍꇈꃲ

ꋋꇅꇬ，ꑓꁴꄩꑌꅐꏾ

ꋊꃅꅐꅑꉌꊭꂷꐛꄉ

ꋋꇅꃅꐚꄑꏿꁈꀋꐥ）

ꉠꑵꉙꆹ

ꀊꄶꆃꎭꆈꌠꃅꄷ

ꄙꇁꉐꈎꃅꈱꅇꌊꊿꊏꄉꇬꎷꌠꌩꁧꀊꋨꁧꉬ

ꀊꄶꋪꀕꁍꃴꏭ

ꉌꃀꉂꏣꃧꃨꅿꁮꇙ

（ꋋꆹꁏꌊꐧꋦꇣꄧꈴ

ꎔꃨꇈꊿꇬꉚꇬꅲꀋꋻꅈꇬꈴ

ꆃꎭꃅꄷꏹ

ꉌꃀꎔꑭꑌꇈꌠꁧꇂꇈꒉꈧꌠꉜ

ꋋꆹꆃꎭꃅꄷꀉꁌꊂꌒꈧꌠꁳ

ꂵꇗꂵꌋꀕꌠꋌꒃꁦꈌꁧꇇꅞ

ꊖꆈꋋꁕꄩꃰꊿꈀꐥꌠꃅ

ꋧꃅꐥꇐꀑꇬꁌꒉꎻ

ꋬꂻꋀꁳ，ꉌꌒꋀꁳ）

ꉠꑵꉙ

ꀒ！ꉠꑵꉙꆹ

ꍜꇰꀉꇐꌳꃈꌳꈄꐨ

ꁍꃀꅩꒌꉌꐒꑓꎭꐨ

ꑵꉙꇆ，ꀒꁧꉜꄉꄁꃰꏿ

ꁧꐙꂿꃅꋦꌠꉜꄉꁏꆹꂸ

ꒊꃀꂿꃅꑟꌠꉜꄉꈭꆹꂸ

ꆏꊋꐛꎂꀕ